اکستان نے اقوام متحدہ کے انسانی حقوق ہائی کمشنر کی مقبوضہ کشمیرسے متعلق دوسری رپورٹ کا خیرمقدم کیا ہے۔ ترجمان دفتر خارجہ ڈاکٹر محمد فیصل کے مطابق پاکستان نے اقوام متحدہ کے انسانی حقوق ہائی کمشنر کی مقبوضہ کشمیرسے متعلق دوسری رپورٹ کا خیرمقدم کیا ہے جس میں کشمیریوں کے حق خود ارادیت کے احترام پر زور دیا گیا ہے۔ ترجمان دفترخارجہ کا کہنا ہے کہ ہائی کمشنر کی مقبوضہ کشمیر میں انسانی حقوق کی خلاف ورزیوں کی تحقیقات کیلئے انکوائری کمیشن کے قیام کی سفارش کا خیر مقدم کرتے ہیں، رپورٹ میں پیلٹ گنز کے استعمال سمیت قابض افواج کی بربریت کا حوالہ دیا گیا۔ ترجمان دفترخارجہ نے یہ بھی کہا کہ مقبوضہ کشمیر اور آزاد کشمیر و گلگت بلتستان کے حالات میں کوئی مماثلت نہیں۔ ترجمان دفترخارجہ کے مطابق مقبوضہ کشمیر دنیا میں سب سے زیادہ عسکری مداخلت والا خطہ ہے جب کہ آزاد کشمیر اور گلگت بلتستان غیر ملکی سیاحوں کیلئے کھلے ہیں، مسئلہ کشمیر کا واحد حل عوام کو اقوام متحدہ کی قراردادوں کے مطابق حق خود ارادیت دینا ہے۔ اقوام متحدہ کی انسانی حقوق کی کونسل نے کشمیر پر 2019 کی رپورٹ جاری کی ہے جس کی تیاری میں مقبوضہ کشمیر کی تنظیم جموں کشمیر کولیشن سول سوسائٹی (جے کے سی سی ایس) نے اہم کردار ادا کیا۔ رپورٹ کے مطابق بھارتی فوج مقبوضہ کشمیر میں غیر قانونی حراست اور جبری ہتھکنڈے استعمال کرتی ہے، 2018 میں 160 لوگوں کو شہید اور 1253 کو نابینا کیا گیا، بھارتی حکومت کی جانب سے کشمیر میں انسانی حقوق کی خلاف ورزیوں میں بے انتہا اضافہ ہوا ہے جس پر شدید تشویش ہے۔

چیئرمین جوائنٹ چیفس آف سٹاف کمیٹی جنرل زبیر محمود حیات نے جمعرات کے روز اسلام آباد میں وزیراعظم عمران خان سے ملاقات کی۔ملاقات کے دوران مسلح افواج سے متعلق پیشہ ورانہ امور پر تبادلہ خیال کیا گیا۔

آرمی چیف جنرل قمر جاوید باجوہ نے کہا ہے کہ پاکستان مثبت انداز میں امن اور ترقی کی راہ پر گامزن ہے۔ آئی ایس پی آر کے مطابق انہوں نے گزشتہ روز کور کمانڈرز کانفرنس سے خطاب کرتے ہوئے ان خیالات کا اظہار کیا۔ کور کمانڈرز کانفرنس میں جیو سٹرٹیجک حالات، کالعدم تنظیموں کے خلاف کارروائی، قومی سلامتی کی صورتحال، بھارت، افغانستان اور ایران سمیت علاقائی سکیورٹی صورت حال کا جائزہ بھی لیا گیا۔ جنرل قمر جاوید باجوہ نے شرکاء کانفرنس کو ملکی معیشت کو مضبوط و بہتر بنانے اور طویل مدتی فوائد کیلئے حکومت کی طرف سے مشکل مگر انتہائی ضروری اقدامات سے آگاہ کیا۔ انہوں نے کہا کہ پاکستان مثبت انداز میں ترقی اور امن کی راہ پر گامزن ہے اور پائیدار امن و خوشحالی کی جانب یہ سفر جاری رہے گا۔